Project Canterbury

   

NA

SATA BARANWAEFUTA KI

ki saea lau ania

NA FIKUTAI COMPANION.

___________

Na taloa Oe na taloa tua firi.--Ps. 145.13.

Na taloa Oe ka leka mai.--Mat. 6. 10.

9d.

______________________________________

Printed at the Melanesian Mission Press,
Taroaniara, British Solomon Islands.

     

Transcribed by the Right Reverend Dr. Terry Brown
Bishop of Malaita, Church of the Province of Melanesia, 2007


*
_____________________________

Rules, Order of Admission, and Office

of the COMPANIONS of the

Melanesian Brotherhood (Retatasiu).

Qara'ae, N.
Mala, British Solomon Islands.
_________

MELANESIAN MISSION.

______________________________

*

[3] NA TUALADA COMPANION.
_______

1. Na raoa kira sulia boni firi na fo'ona'a fuana kira Bara-nwae-futa ma kira rorodoa: ma ka fo'o noni mabe fainia toa oro ki.

2. Tai qatea ana tai fainali ana boni S. James diia nee kira alua ana district. Na qatea ne'eri na Priest ana district ke qatea fuana Ma'a kia Bishop fuana abea-ania na Bara-nwae-futa ana raolada isafitana toa tua rorodoa ki.

3. Kira ke fikutaifau fuana fo'ona'a ana Friday ki.

4. Kira ke fiku ro-fau ana tai fainali ana boni S. Matthias fainia boni S. James. Diia nia talanwarau kira taifau ana district, si ta bali district, ke fiku taifau ana boni S. James fuana Fana Abu, ma ana boni S. Matthias i fanoa kira ki talada.

5. Na fikutai nwae ana fanoa ke efoa ta Leader, ma kira ka ronosulia.

6. Ta ai ada noa kasi nenea na Leader.

7. Na fikutai nwae uri ke qatea na etafata'ana kira saena Luma Abu inaona Altar; sui na Priest kafi nalida saena.

8. Na ono nwae ki ka dao ana 12 nee bolofainia tai fikutai nwae.

9. Na nwanwane si kini bore lea goo ana.

10. Kaidai ki lisia 18, nia bolo fainia ki etania lau ta fikutaiai matamata; ka uri logo ana 24, 30, 36, 42.

11. Nia bolo fuana na fanoa matamata ke sasia na fikutaiai kira italada, bore noa si tasa ana 12 fuana tai fikutaiai.

12. Ki ala'ania raoa nee ke leka daudona fuana fanoa i Melanesia taifau.

[4] 13. Ki aladanalu nam ania satai ana 3 raoa diia ta ru nia ogatoofu ana, nam si nia ka tua ato tak; ma noa si kulufafia satai ana.

14. Na 2 raoa noa kasi fonea satai fa'asia qatea ana Fana Abu nam na qatea abeani na Lalusae, nam fa'asia qatea abeania fanoa ke gania na qaiabera-ana, nam na qatea abe ania satai goo diia ka bolo fuana; ma na ru ana magalia nam ana noni noa kasi fonea satai fa'asia na qatelana qatea.

15. Satai ana fikutai sata ka asia, na Leader ke alua ifafona na raoa ni manata oli diia na Priest nia manata toana, ma nia ka lulu ni qaiabera tasa fa'asia kaidai nia noa kasi asia uri ke saetafa ana manata oli nia.

16. Ki nali olitai falu lau ana satai nia asia na'a.

17. Tai nwaea ana fikutai sata ke fata lealea firi ana Bara-nwae-futa ma ka qaloda i luma kira ki, ma ka qatea fuada na fana ma na kafo, uri ki lia saiana ne'e mia sata to'ofu fuada Nwaiasina, diia ne'e bolo fuana ka sasia.

18. Diia satai nia dila fa'asia na Taki ma na Raoa ne'e ki na Leader ke famanata. Si nia noa kasi ronosulia na Leader na Leader ke nalia fainia ta ro nwae nam ulu ru ana fikutai sata. Si nia noa kasi manata oli na Leader ke fa'aronoa na Priest, ma na Priest kafi lalia na nwae neana fa'asia na Fikutai sata.

19. Noa kasi nali olitainia na nwae nia nenea na Taki ma na Raoa kaidai oro ki; ma ke nali olitainia goo satai nia asia na'a, ma nia ka qaimanatai mamana ma ka manata oli mamana.

20. Satai non si siuabu ua noa si kula ana Fikutai sata.

21. Noa si efoa goo na Fa'amanata ki fuana Leader ana, ma satai na tualana nia bolo fainia.

22. Si ta nalunalua nam ta qaifata ana ka etania isafitana ta fikutaiai ifai, ke saetafa ana fuana Priest, ma nia kafi fata musia fuada.

23. Si satai oga ke sakatafa fa'asia na Fikutai sata ke saea fuana Leader, ma na Leader kafi fa'aronoa na Priest, ma si na Priest ka ala'ania nia ke sakatafa danalu fa'asia.

___________________

[5] NA RAOA COMPANION KI.
______

1. Na Raoa fuana God.

Raoa nau fuana God nia uri, fuaku ka manata mamana Nia ma ku mauabu Nia, ma ku liana teoliu Nia ana siraku taifau, ma ana manatalaku taifau, ma ana maurilaku taifau, ma fainia ramolaku taifau, nau ke sasi na ru aabu fuana, ku fatalea Nia, ku fitoana mamana Nia, ku foo fuana, ku fu'usidoe ana Satana Abu ma ana Fatalana, ma ku rao mamana fuana sulia boni nau ki, dao ana maea.

2. Na raoa fuada nwae ki.

Raoa nau fuada nwae ki nia uri, nau ku liateoliu ada diia nau ku liateoliu oliaku, nau ku sasi fuada diia nau ku oga kira ka sasi fuaku: nau ku lia teoliu ana ma'a nau ma na tea nau, ku fu'usidoe ana keroa ma ku abe ani keroa: nau ku fu'usidoe ana Aofia, ma toa kira inonotoa i nunufana, ma ku ronosulia fatalada: nau ku tua aroaro fuana toa a'ana ki, ma toa fa'amanata nau ki, ma toa kira sairu tasa aku: ma ku si fa'afia satai ana fatalaku ma na raolaku, ma ku rao mamana taifau: ku si manata ta'a ma ku si qaqausu nene satai seana siraku: ku lia suli nau ma ku luia limaku fa'asia bililana ru ki ma meaku fa'asia fata ta'a ma sokea: ku lia sulia noniku fa'asia fana doe'a, ma qaufilana kafo gwaubalia, ma usua; kusi oga nene ana ru nwae matamata, ma nau ku raoa lea ana fanalaku, ma ku tua le'a suluia na tuala meana, God Nia efoa na'a fuaku.

___________________

[6] NA ETAFATA'A.
_____

1. Tae oe ko etafata'a fuana God kaidai kira siuabu amu?

Nau ku etafata ana ulu ru ki.

Etana: fuaku ka siki tau fa'asia Satan ma afutana raolana, ma ru fa'asi doe ani ki, ma na ru launi o'o ki, ma na ogalana ta'a ki ana fasiana.

Ruana: fuaku ka manata mamana ana ru ki taifau ana taki sa Christ.

Uluna: fuaku ka dona sulia na ogalana aabu ma na taki ki ana God, ma ka sasi sulia dao ana maea.

2. Oe ko oga abeania fainia na Fikua Qaima ana kira Bara-nwae-futa?

Ua, nau ku oga ku sasi nira.

3. Oe ko etafata nee oke dona mamana na Taki ki ana?

Ua, nau ku etafata mola nira.

KAMI nali oe mai saena Fikutai Companion ne'e, ma God, Nia alua na manata le'a ne'e saena siramu, Nia ka fa'anasi daofailiu amu ana. Ma God na Ma'a, ma na Nwela, ma na Anoiru Abu, ke fa'alea ka ufone'o tutua firi. Amen.

_______________________

[7] NA FO'ONA KIRA KI.
________

Sulia boni firi--

SAENA Satana Ma'a, ma na Nwela, ma na Anoiru Abu. Amen.

LORD Jesus Christ, Oe ko baeda qau na tooa Ilifata'a Abu Oe ki uri kira ka fatatalo ani na Ala'ana lea Oe fuada nwae ki; kami ka ino amu uri Oe ko fa'alea na raoa ki taifau ana Lalusae Oe siada toa rorodoa ki. Qatea mai fuana na Bara-nwae-futa na ru oro lea ki fuana ka abe lea anida; ma ka sasi na raoa kira ki taifau ka lea daofailiu. Ko foneda, Ko liliuda, Ko fa'alea kira, Ko ba'ea lau mai tiai kira bolofainia raoa nee, uri tiai kira maemae olofana ta'ana ka nalia logo ada na mauria, uri na Satamu ka doe ine'e saena magalia; Oe mauri fainia na Ma'a mana Anoiru Abu, God taifilia, Ka tutua firi. Amen.

GOD Inotoa Mamana, Oe manatai tooa kira noa si saiana Oe ua, kira tua rorodoa, kira tua inunufana maea. Oe qatea na Anoiru Abu Oe fuana ka rao nasinasia saena sirada, fuana ka fa'asaiana kira ana ru taa kira ki, fuada ka rono mamana ana fatalana Jesus sa Fa'amauri, kira ka rono sulia nonilea na taki falu nia bolo ana Mauria firi; ana Jesus Christ sa Lord i kami. Amen.

NA Qatea ana Lord ikia sa Jesus Christ, ma na liana teoliu God, ma na qaima'a ana Anoiru Abu, ka tua faikia taifau tutua firi. Amen.

[8] Ana Friday--

¶ Ke nulia na fai Nu bolo ana, ma ka to'omainia na ro Fo'ona'a ne ki, tai ana ta Friday, tai ana Friday.

1.

Leader--

Nia bolo fuaka taena ma sulia boni firi

Ka fainotoa God. Amen.
Fa'aua na taloa Nia i olofana, Amen.
Ufonea na nonika. Amen.
Manata oli fa'asia ta'asia ta'ana'a kia ki. Amen.
Tua lea na'a fa'asia tua'a ua. Amen.
Fefeo fa'asia ketoa firi Amen.
Sasi-akau fuana mauria firi. Amen.
Rao lea saena magalia. Amen.
Abe ani nwae-fanoa kia ki. Amen.
Sisikoa ania ru launi o'o ki ana magalia. Amen.
Fua fonea akalo soke ki. Amen.
Liufia na nonika. Amen.

Ki mae, tak, ma ki keto.

Kia fa'amamana God ma ka saeleana

Ana kaidai Siu-Abu
Kia nalia na'a mauria anoiru.

Ana Kaidai Daufafi-gwau
Kia nalia na mamana anoiru.

Ana Kaidai Fana-Abu
Kia nalia na fana anoiru.

Ana Kaidai Luge-Uiania
Kia nalia na sakadola'ana ana.

[9] Toa oro--

Kia fa'amamana ma ka saetafa ana uri ana sulu'ilaka, ka fa'anasi kia, ka sare kia ma ka fa'asakadolu kia lau.

Leader--

Osiana ka sae kia sulia boni firi ka

Qaima fainia Christ. Amen.
Saetafa ana Christ. Amen.
Rao fuana Christ. Amen.
Saelea fainia Christ. Amen.

Nam ka sae kia ka mae aena Christ, ana ta boni ke sae kia ke inotoa fainia Christ. Amen.

Fatalea, saelea, Lord Jesus Christ, ana qatea taifau Oe nalia mai fuamia, ma ana fiilamu usikami.
O! Folioli Abu, Satakami ma Sa'omia, Ko abe ani kami uri kami kai sailea Amu fa'asia inao, ka liana teoliu tasa Amu fo'osia inao, ka dona lea Amu fa'asia inao.

Lord, fa'amanata kami ana tala ana fata'a-saea Oe,
Ma kami ka dau nasi ana.

Qatea mai fuamia na liato'ona uri kami ka dau nasi ana Taki Oe,
Ma kami ka dona sulia ani siramia taifau.

Kami manata mamana Oe, God,
Ani manatalamia taifau, ma na maurilamia taifau, ma na maudilamia taifau.

Kami liateoliu Amu, God,
Ani manatalamia taifau, mana maurilamia taifau, ma na maudilamia taifau.

Kami mauabu Amu, God,
Ani qaiabera'ana Oe.

Kami ke fatalea Amu, God
Ani qiabera'ana Oe.

[10] Kami ke fito'oamu, God,
Ani qaiabera'ana Oe.

Kami ke ri'uamu God
Ani qaiabera'ana Oe

Kami ke fuusidoe ana Satamu nia Abu ma na Fatalamu
Ani qaiabera'ana Oe.

Kami ke raoa mamana fuamu sulia boni kami ki
Ani qaiabera'ane Oe.

GOD Inotoa mamana, Oe qatea mai fuamia kami ka sasi taifau ana ru bolo fuamia ka sasii fuana nwae fanoa kami ki, si kami ka liateoliu ada diia kami liateoliu oli amia, ma ka sasi lea funda taifau diia kami oga kira ka sasi fuamia. Amen.

Si kami ka liateoliu ma, ma ka manata kulu ma ka abeani ma'a kami ki ma na tea kami ki, ka manata kulu ma ka ronosulia na Aofia ma toa kira inotoa fone kami ana satana, ka tua fatiti'i-oli kami olofana toa fa'amanata ma ka sairu tasa amia. Amen.

Si kami ka tua aroaro, noa kasi fa'afia satai ana fata'a nam ana raoa, noa kasi foli sokesoke ma ke saga go'o, noa kasi nunununu ma noa si qaqausu nene satai saena siramia. Amen.

Si kami ka lia sulia nonimia fa'asia na usua, ma fana doea, ma na qau gwaubaliana, noa si oga ru ta nwae matamata, ma ka rao lea ana fanalamia ma si kami ka tua lea sulia na tuala neana God ke ofoa si kami ka tua sulia ania.

Kira taifau--

Kami gania na ru nee ki taifau i osiana sa Jesus Christ sa Lord ikami. Amen.

____________________

[11] 2.

SAENA Satana Ma'a, ma na Nwela, ma na Anoiru Abu. Amen.

Lord, manatai kami.
Christ, manatai kami.
Lord, manatai kami.

MA'A kami ilani, na Satamu ka abu. Na taloa Oe ka leka mai. Kami ka sasi na ru Oe ko ogai iano diia ilani. Oe ko qatea mai taena fuamia na fana ka bolofainia taena. Oe ko lugeuiania sasita'ana kami ki, diia kami lugeuiania sasita'ana kira ki. Alua dana'ani kami saena sokea; Oe ko nalia olitai kami fa'asia ru ta'a. Na taloa ru Oe, ma na mamana, ma na rara ka tutua firi. Amen.

Leader--

Lord, alua manata toana na ru ta'a kami ki ma na ru taa ana ko'o kami ki, ma ru tasa na foli oli ana Abumu,

Lord lea, Oe fa'amauri kami.

Lord, kami toa ta'a ki ka ganiamu Oe ko lia siralea ana Lalusae Oe ana fanoa oro ki saena magalia, ma ka fa'alea na raoa ki taifau siada toa rorodoa ki, uri satai faida nee ke lifurono ani na taki Oe ke tua ania na qatea Oe ma na qaiabera'ana, uri na taloa Oe ke funulia mai i Melanesia ma saena magalia taifau;

Lord lea, kami ganiamu, rono kami.

Si Oe ko fa'alea ma ko liliua na Baranwaefuta i Melanesia, ma si na raoa kira ki ka lea daofailiu ana fanoa kira tua ani ki, ma si na toa rorodoa ki ka ronosulia na fata'a ni lifuronoa kira ki;

Lord lea, kami ganiamu, rono kami.

Si toa kira school ana fanoa kira ifinida na'a ki ka doe fainia na qatea Oe, ma kira ka faiburi ani na tuala rorodoa ma na tualada akalo soke ki ma na sokea ki taifau, ma ka ratai ana manata'a mamana kira ka daoana talo'a Oe tua firi;

Lord lea, kami ganiamu, rono kami.

[12] Si toa kira faamanata saena school i Tabalia ka tua fainia na manata'a mamana, no lia too ma na aroaro'a, ma uri tiai kira lulu'uana na fuli baranwaefuta ineana ka nalia na liato'ona na fa'atiti'oli ma na mamana fuana raolada ana ta boni;

Lord lea, kami ganiamu, rono kami.

Si na lalusae ine'e Mala ka tua diia na madakola'a fuakira rorodoa saena fanoa ne'e, ani na tualada ma na raolada lea, ma si Oe ko fa'aleada Nwaiasina ine'e ki, Ko dau nasi ada saena ilito'ona kira ki, ma Ko fa'anasida ana kaidai-ato ma fii'a saena raoa kira ki;

Lord lea, kami ganiamu, rono kami.

Si na lalusae i Santa Cruz ka nasi daofailiu, si na abuda Abu Oe ki ka etania na fisi'a doe, ma kira Nwaiasina saena fanoa neana ka dona sulia na Tualada kira etania inao ineana, ma ka fa'aua na Lalusae Oe siada;

Lord lea, kami ganiamu, rono kami.

Si na lalusae Oe i Guadalcanar ka akoako ana Anoiru Oe ma ka lifurono ani na fata'a fa'amauri Oe, ma si na Nwaiasina kira rao saena fanoa neana ka funu sulia manatalamu lea liu, ma ka tua noni-lau ana leka'a kira ki;

Lord lea, kami ganiamu, rono kami.

Si na lalusae Oe i Bugotu, Gela, Laube, Savo, San Cristoval, Ugi ma Ulawa ka dona na fatalamu ma ka leka faaronoda toa saunainida ki taifau, ma ka roo ana fainia saeleana'a, ma rao daofailiu ani sira mabe;

Lord lea, kami ganiamu, rono kami.

Si ka manata toana na lalusae Oe i Sikaiana ma i Tikopia ka dao failiu, ma kira ka abe ani nwae futa kira ki ana fanoa matamata ki, ma si na madakoa Oe ka sina tafainia na fanoa tua rorodoa ua ki i Belona, Rennel ma i Lord Howe, si na tuaa rorodoa kira ki ka no ana ma na ala-ana lea Oe ka sina fafida;

Lord lea, kami ganiamu, rono kami.

[13] Si na lalusae Oe i New Hebrides, Banks ma i Torrres ka ru-u tafa ma ka lulu-uana na sheep Oe ki kira rora ua ana fanoa ne-eri ki, ma ka qaloda nonilea mai saena failabu Oe;

Lord lea, kami ganiamu, rono kami.

Si tiai i Melanesia kira manata mamana ka tua ua i Fiji ka uu nasi saena maria, ka abe ani fuana lifuronoa ani na alana lea fuada nwae futa kira ki, ma Oe ko fa-atani fuada na tua'a lea kira Nwaiasina kira fa'a ua na-a i safitada;

Lord lea, kami ganiamu, rono kami.

Si tiai kira rao ana Government, ma ana Plantation ki, ma fainida kira folifoli ki ma saena faka ki ka etania raoa fuamu sa Lalifu mamana, ma ka dona mabe sulia na taki saea Oe;

Lord lea, kami ganiamu, rono kami.

Si na China ki ine'e siamia i Melanesia, na liada ka teoana na madakola Oe ma ka ra'e saena na futa'ana faolu faikami;

Lord lea, kami ganiamu, rono kami.

Si na sirarorodoa i Rabaul ma i New Guinea ma ka dao ana isilana magalia ka rono saiamu ma ka lulu toamu sa fa'amaurida;

Lord lea, kami ganiamu, rono kami.

Na Fata'a Saeleana.

MA'A qaimananatai, kami saelea liu Amu ana Oe falama'ana na Lalusae Oe fuana ka fa'arono ma'udi ania na Ala'ana le Oe fuada fui nwae ki taifau; kami saeleamu osiana tiai kira sakatafa fuana ka rao fuamu ana fanoa tau ki, ma ana fa'aleana Oe fafaona ru oro ki ana raolada; kami fatelea Oe osiana nwae ana fanoa ki kira mamata mamana Amu osiana fata talolada; ma ana kira ka fa'alaunia na fa'amanata lamu ana ru oro ki; ma iosiana fa'amanata ki ma toa rao ki taifau ninia siada nwae fanoa kira ki kira ka farono tafa ani na fata'a mauria Oe; kami ka faalea na Satamu nia Abu osiana nwae rao Oe ki noa kasi manata kulu ana maurilada ma ka tua mamana dao ana maea ana fata taloa ania na Ala'ana lea Oe uri [13/14] kira ka fa'asui nonilea nalekalada; ma kami ka ganio uri Oe ko dana-ani fuamia na qate lamu mai ilani kami logo ka dona na tualada lea, kami ka qaima taifau fainida saena taloa Oe ilani; ana Jesus Christ sa Lord ikami. Amen.

GOD Inotoa mamana, Oe qatea na mai fuamia, fuana ka foo taifau fuamu niriari; ma Oe etafata na uri si ro nwae nam ulu ru ka fiku sulia Satamu, Oe ko qatea fuada na ru kira ganio ana; Lord, Oe qatea taena na ru ki kami ogai, na fo'ona kami ka abe alea ani kami; qatea mai fuamia ka saiana mamana Oe saena fanoa oro ne'e ki, ma na mauria firi saena fanoa ua mai. Amen.

NA Qateana Lord ikia sa Jesus Christ, ma na liana teoliu God, ma na qaima'a ana Anoiru Abu, ka tua faikia taifau tutua firi. Amen.

___________

MM. Press, B.S.I. 500. 10-'53


Project Canterbury