AINDAH MEILTEING YOON OOLAHQUINEHPOOWAUKUN NALAULQUAING.
The Order of the Administration of the Lord's Supper, or Holy Communion.

¶ Wauk nah Papimitoonhais aleich eet Nalaulivait Pahpahtumwawaukun, aleich nahwundahmoteit pahtumowateit, neik linnalipawug nesheedquehrenook.

NUCHWHENAH aipyun ahwosaukumawh whaerlindahsowitch kitisheenzwaukun: kekiyoowaukun payawekitch lakitch aleh ta-hiyun yoon tahleh aukeeng, ailkehquelaig tahleh ahwosaukumawh. Melenain qui keishqueik wa taupwaunmeyaink; wauk mewalindumowhwenain njunowhsoowaukuninahnul, ailkeh neloon mewalindumawhwaink neik chachunelawh waimquaimgweik. Wauk chelahbawhnain leh ahquachetoowaukunink: shukquint ketinehnain winjeh matehkink. Ahloot kinehlahtumin kekiyoowaukun, wauk pahtahweilsoowaukun, wauk quelowhwailmooksoowaukun leh hulmewh wauk aupcheh. Amen.

Nin Pahpahtumwawukun.

AILWONTOOWEYUN Katanehtooweyun wameh namun wameh neal wdamahnul wawehtowhwun, wameh neal leta-hawaukunul, wauk mauhaum kaingkeh wunoo lehloowun nachpeh neal matehkeil; yoh weengeh nun Peilseid Kchechauk belehkaukoonain ndanahnink, wainjeich weengeh ahwaulkiyun wauk wainjeich pelehtowhwaink yoon peleik kitisheenzwaukun, yoon leh wun Christ Gekiyumnah. Amen.

¶ Nullitch nah Papimitoonhais quolluppewh leh wdilnahpamink aleich eet neal waim neal kekeindwaukunul wauk neik linnahpawug wtilleich nesheedquehrenawh tahitch waim aukeindonga aukukeindwaukumil aleich eet Pahtumowaus ktumaukailmenain ailkeh mahchetahwaingiueil ktukakeindwaukunul wdaming loowehlaukeil wauk kitmaukalindwaukun aukailnumaing aindah taip likkehquewh payaweik.

PAHTUMOWAUS wesenaip yool auptoonaukunul wauk oowh; Nee Nalaulwait Kpahtumowaus; Chelaum ahwaingktugkun koo Pahtumowahsewin nee alooquapeyun tahleh.

Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum koo lehtahmoowahwin khugki mseenkq, enah wamehquaik alehnah-quah, enah omneik ahwosaukumawh apehcheik, enah quaik yoon aukeeng atakeik, enah beengk ataik. Wauk ahlahmaukumeik cheh pahtumowatoohun wauk cheahlookatahwahweh: aleh Nee Nalaulquon Pahtumowaus ndilleh aukauhralingain nee Katanehtooyaun; wauk ndilleh quelahmin mahtahlookawaukun wauk wanehchahnecheik mahtahlookawaukunawah wnehchaunwahwink, leh ta nah pacheh nhra wauk nawin ahahnekowewh keshekecheik neik sheingehnowhwecheik, wauk ndilleh pinoondekain kitmaukawaukun neik aweh ketalooteit neik awhahlecheik, wauk kailnumoteit ndukakeindwaukunul.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwauknn.
Papimitoonhais. Chelaum ahlowh queweendahmoowin Nalaulquon Pahtumowaus witisheenzwaukun. Aleh Nalaulquon Pahtumowaus mautah witillailmahwin ahwaneil wun Wailsittong allowh waweendonk keil kitisheenzwaukun.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Mishahtah kindwawh keishkoo wauk pelehtool. Shuk gudtaush keishkoowul ktahlooka, ktilleich makindahmin warn eh ktahlookawaukun. Shuk neshaushtreh keishquaka nin kindwain Nalaulquon kee Pahtumowaus queishkoohun. Nul nin tahleh chelaumpahlewhquikkmehkindahmowin; kee, enauhaum quesis, enah kedahnis, enah ktahlookaukun linnoo, enah ktahlookaukun ochquawh, enah ktaulmoonzuck, enah ahwain chaipseid watrooquou. Aleh naikmah Pahtumowaus keshalindonk waukoong, wauk aukeeng wauk ketauhekun wauk wameh quaik nah atakeil gudtaush aintrehkeishquekaig. Nul nin wainjeh Nalaulquon ktumaukalindonk kindwawh nee keishkoo wauk pelehtoon.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Ahwaul kuch wauk kick; wainjeh koonowhseyun yoon tahleh aukeeng, Nalaulquon Kee Pahtumowaus aleh meilquon.
Linnahpawug. Nalaulwayun ktumaukailinenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum kneilwawin.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum kmahchetoowin wetowhwaindwaukun.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum kumootoowin.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum kmuttaukinehwahwin wetowhsoomut.
Linnahpawug. Nalaulwayun ktumaukailmenain, wauk wainjeich saukehtahwaing tahleh ndanahnink yoon aukakeindwaukun.
Papimitoonhais. Chelaum queingehnumowhwahwin wechekaimquon wekeit, chelaum queingehnumowhwahwin wechekaimquon wewul, enah neal linwul wtahlookaukunul, enah neal ochquawul wtahlookaukunul, koolowhwewh wtaulmoonzul, enah onaniyoonksoomul, enah wamehquaik aleh nahquah nalaultong wechekaimqun.
Linnahpawug. Nalaulwayun ktumaukailmenain, wauk wamehlaik hah yool ktukakeindwaukunul tahleh ndanahnink, wameh Kee knaukahleloonah.

¶ Nullitch neh Jcnahwundahmenain yoon pahpahtumwawhahlaing Queen, nun Papimitoonhais nepowliwitch alooquapehyaig waukitch oowh.

Yuch pahtumowahtook.

AILWONTOOWEIT Pahtumowaus nun quekiyoowaukun hulmaukumehquitch wauk pahtahweilsoowaukun tahlewh, ktumaukalindah maischayaik Pahpahtumwawaukun, wauk wainjeich wdahink pepenahwut ktahlookaukun VICTORIA, Gekiyumnah wauk Govnul, wauk wainjeich wawehhaut tah ahwain wapapimitoonhaismecheil, wauk wainjeich wamehquaik naing wauk quelahwailmooksoowaukun; wauk wameh wtilleh wtilnah-pameing neloonah wauk wameh aleh meilquoseit wainjeich wlaulwawetahaweh wauk noondiyalinzoo ahwilsitoond, leh khugkaing winjeh ktumauka leh tauptoonaukuning wauk pacheh Jesus Christ Nalaulquaing, nun wechawhquon wauk Peilseid Wchechauk pamowhseit wauk kakiyeit miyowhseit hulmewh Pahtumowaus. Amen.

¶ Nullitch nin aleheit nin neal nahwundongeil neik linnahpawug wtilleich nepowhwooltenawh.

NOALSITTUMIN miyowhseit Pahtumowaus Watuchwheing Ailwontooweit keshetoot ahwosaukumawh wauk aukeh, wauk wamehquaik nawhquauk wauk mahtahnawhquotook. Wauk miyowhseit Nalaulwait Jesus Christ naikqteh queesmooquik Pahtumowausul, wauk nenootch Watuchwhecheil eyais quah keshalindahsekeil wameh aukeyul, Pahtumowauseit Pahtumowaus, Wauhrakung Wauhrayaig, kalah Pahtumowauseit kalah Pahtumowaus; eyais quah quaik keshetahseik gudtail ahpoowuk Watuchwhecheil, wauk naikmah wamehquaik wainjeh keshalindonk; wauk naikmah keloonah wauk keloon pamowhsoohaulquaing ahwosaukumawh wainjeh yohaut, wauk oonjeh keshekeh winjeh Peilseidtink Mary nachpeh Peilseid Ochechaukoong, wauk linnoong lenauksoop, wauk sahquetahaup winjeh keloonah tahleh aquewh quekiyoowaukuning Pontius Pilate; wauk ahwaindahmoop wauk waulhahsoo, wauk naerheh keishqueka lahpeh aumwewh nul paukonjeh lawh alauptoonaukah wlaumwawaukunul; wauk ispewh leh ahwosaukumawh, wauk wluniuttahpoo wtilnahahwuning Watuchwheing; waukitch lahpeh pawh nachpeh welahwailmooksoowaukun aleich keshaukinehmaut pamowhsecheil wauk manehlahcheil, nun hah quekiyoowaukun mauhaum wewehqueirnook. Wauk noalsittumin wtilleh ahpein Peilseid Wchechauk, Nalaulwait wauk wtilleh makin pumowhsoowaukun, nun waindining Watuchwheingink wauk Waquesink, nun gudtail apehteit Watuchwheing wauk Waqueseing aindah pahpahtumong wauk aindah mahminjeimquah, nun ayeit winjeh mamamaunsetetoop. Wauk noalsittumin miyahteik leh ahtawh pahtumwawaukun wauk pahtumwawaukunawah Apostleug; wauk noalsittum leh ahtawh miyaut sokinehpaultoowaukun wainjeich mewhpaik wameh muttowhsoowaukunul, wauk batoon wtaumwewaukun oowah manehlahcheik wauk pamowhsecheik ailkeh aquaukeyeik. Amen.

¶ Nin nach Papimitoonhais wtukeindahminul aldinduk yool lalahlukynewh.

KALAH kaitch quaurhayaikmoowahwul leh wauhrayawul nin aleh lahwakahpahweteit neik linwug, wtilleich naminawah kshachkahlookawaukunoowah, wainjeh welahweh lequaik nun. Kuchwhah waukoong apeit. Mat. v.

Mauhah neik wameh alehteit Nalaulyun, Nalaulyun, peinjehkawewug nin tahleh ahwosaukumawh kekiyoowaukuning, nun hraitch shuk alahlookait alehtahaut nun Watuchwheeng apeit tahleh ahwosaukumawh. Mat. vi.

Pachach nepowhwoo nah Zaccheus, yoon nach wtillaun Nalaulwacheil, sha Nalaulwacheil pahsewh neal diyehkunul nmehlahnawh neik kaitmahsecheik; wauk aum pahchoolauka ahwain linnoo nawin lahpewh nmehlowh. Luke xix.

Tahnitch ahwain kahrahnehtitch neal nalaulquaukeil, peish nawahta neal wemahtisul ailkeekq ktumauksecheil, mah ktumaukailmahqua; taun aum hah wtilleh mshinamun ktumaukailmooksoowaukun. 1 John iii.

Nun ka kaitmaukailmaut neal kaitmauksecheil wnutmehahnahlitch neal Nalaulwacheil; pinnah neal aintreh makik, nullitch neh lahpewh treh ainhowhwaun. Prov. xix.

Ktumaukailmooksoowach nun linnoo noocheengahlaut neal wenahmulsecheil wauk neal kaitmauksecheil; wetauhaimkoolitch neal Nalaulwacheil kneh aweh lenunga. Psalm xli.

¶ Aindah neal laikhekunul aukeindahseik nullitch nah ahwain aleitch mishining meilteingeil leh kaitmaukseting, wauk neik linnahpawug, aleh poonamooteit jyukkeinjoong, wauk nullitch neh patowhwaun nun Papimitoonhais aleitch poonehnink leh ahindachpwehgink.

KELOO ahwain wlaumwawewh wauk shachaukahpawewh poonehtaukq neal kmuttowhsoowaukunwah, wauk aleh ahwahlut wauk wlaungoomut wameh neik wetowhsoomahcheik, wauk tahlowhseing wiskeh aunjewh pumowhsoowaukuning, nahwondonk neal wtukakeindwaukunul Pahtumowaus, wauk pimisseit qui winjeh nin peleik aleh wlalindonk, nah haukq keirkewh nachpeh wlaumwawetahawewh, wauk nahtinneh yoon peleik oocheingawaukun ninitch keloo pamowhsekahquaikq; wauk lehtook keloo knoondiyalinswaukunwah mecheirtowhwo nun kacheh Pautumowauseit, ailkeh ktumaukseyaig nesheedquetoo winj kitkoowahwink.

¶ Wameich neik palipahtumwaiuuk nullitch neh wsein nun Papimitoonhais.

KACHEH Pahtumowausyun, Watuchmoquon nun Nalaulquaing Jesus Christ, keshetauk wameh quaik, Akinnehmaut waim linwul, nweengeh mecheirtoonain wauk shewalindahmoowetahahnain nmuttowhsoowaukuninahnul wauk nmahtahlookawaukuninahnul, wtamawink wainjeh pahpumowhseyaing ta wauk qui yoon pacheh ailkeh whalin mautahlokiyaing winj eh binowhwalindahmoowaukuninahnink, dauptoonaukuninahnink, wauk mahtaukahtahmaing nin Wtahlooiswaukun, wainjeich taumseh aishkehloop mahnoonksehtahweyaing. Neloon shachaukahpawewh poonehtoonain wauk wdaheweh zhewalindahmahwetahahnain neal nmahtahlookawaukuninahnul; mashahtahmaingwahonk neal nmuttowhsoowaukuninahnul zukqualindahmoonahunk. Ktumaukailmenainauk, ktumaukailmenainauk, nahroo aukitmaukailyun Watuchmelaing; nun hah Waqueesmut Nalaulquaing Jesus Christ, winj eh mewalindahmahwenain wameh neal alahlookiyaingweil wdamink; wauk wetauhamenain wainjeich aupcheh ahlookatoolaing wauk wlehlahwalaing wainjeich wiskewh pimowhsoowewh, ahwilsittoolaing wauk ahwehlahwukinootmaing kitisheenzwaukun, leh Jesus Christ Nalaulquaing. Amen.

¶ Nullitch neh nun Papimitoonhais nepowhwoowitch wauk aleich quoluppeit windahqtiewh leh linnahpawug alahpehteit aleich Pahtumwawhraulaut.

KACHEH Pahtumowausyun Watuchmelaing ahwosaukumawh, kee ailkehqueh kaunzhe ktumaukailmeyaing aleh lauptooniyun ktilleich shaunmahwaun neal muttowhsoowaukunwahwul wameh neik kalah shewalindahmowetahahcheik, wauk pacheh nahsekahquon nin kalah shachaukewh wlaumwawetahahwuning; ktumaukailmokoowautch; ktushahnalindahmahquonawautch; wauk knehlahpawhaulkoowautch wainjeich lahlookiyaig wameh neal walehkeil; wauk kpashookoowautch, hulniewh pumowhsoowaukuning, winjeh Jesus Christ Nalaulquaing. Amen.

¶ Nullitch neh nun Painmitoonhais wsein.

KALACH wlchrin, wauk ktilailmooksenain ktilleich aupcheh, wauk wameh tah aindah peyaing ktilleich melilinain kaukanaumwaukuninahnul kee, O Nalaulwiyun, peilseyun Watuchmelaing kacheh hulmewh Pautumowausyun.

NUL hunneh wecheh Angeluk wauk shayawalehmooksecheik Angeluk, wauk wecheh wameh neik linnahpawug Ahwosaukumawh, neloon kaukanaumwenah wauk nwehlahwuk nootminain welahwailmooquauk asheenzyun; aupcheich kaukanaumloonah kee wauk aleich yaing, peilseyun, peilseyun, peilseyun Nalaulwiyun Pahtumowausyun Waitchwekahmun, Ahwosaukumawh wauk aukeeng ail wchoowahtaik quelahwailmooksoowaukun. Quelahwailmookseh kee O Nalaulwiyun naikqteh hrokelun. Amen.

¶ Nullitch neh nun Papimitoonhais wsein.

MAHTACH dapehkahmoonain dilleh yoon pahnain kdahindachpweingehmink, O kaiktumaukailyun Nalaulyaing, ail wlaumwawalindahmaing nelewh noolowhsoowaukuninahnul, shuk nin ailkeh hrwhaleik wauk kaunzhe ktumaukailyun. Aleh mautah tapeh likkehquilmooksewenain dilleh aum mkinhumnain papinehlaukeil winjeh kdahindahpweingehmink; shuk nul hah kee eyautch Nalaulwiyun, aleh nehlahtumun wainjeh aupcheh ktumaukailmeyaing: lehehnain nauk kaiktumaukailyun Nalaulyaing, wainjeich kalah meichyaing nin Qyoosum nun awahlut Quesis Jesus Christ, wauk aleich minieyaing naikmah mokum, ninitch kmuttowhsowewh khugkienahnul wainjeich lehquaing pelehquaing winjeh naikmah whugkaing, wauk neik kchechaukwnahnuk wainjeich ksheirmookseteit winjeh naikmah naikqteh peleik mokum, wauk ninitch wainjeh taumseh aupcheh wetowhsoomaing wauk naikmah ahpehtahquaing. Amen.

¶ Nul nun Papimitoonhais aleich eet yoon Pahtumowaut aleich peilsohahtunk.

KACHEH Patumowausyun ahwosaukumawh Watuchmelaing, ailkehquahwaulyaing wainjeh meilyaink nun miyowhseit Quesis Jesus Christ aindah auptowhwaindung nin aushtatahekuning nin aleh kahtowh kekaquaink; nin wtindah keshetoon (nin wacheengkatoot gootin nin whugkie) kalah maizcha keshetoot wcheendwaukun tapeh keshainhrailhaut wameh muttowhsoowaukunoowah yoon aukeeng apehcheil: wauk kalah queshetoon, wauk nin peleik oolahcheimwaukun keheimkoonain wainjeich apucheh lawhseenk wainjeich maumshahtahseik nin aleh munnehlatahseit won, nah pacheh aindauj lahpewh paut: pindowhwenain O kaiktumaukailewh Watuchmikiyun kalauk kenaukahlilloh nah wainjeich ktumaukailmeyaink sakeh nautnumaink yoon aupwaun wauk yoon wesaukehmahpoo, ayilleh keshetoot won Quesis Kakehkaquaink Jesus Christ wainjeich indowhwaink yoh ka wetaukehmenain yoon whugkaink wauk yoon omokuming; naikmah wah nin peiskakeik likkehquewh mahtuknemint onautnumin neal aupwahnul; (a) macheh kaukanaumweta pekinumin, (b) otillinmowhwaun neal akakehmahcheil yoon otillaun nahtinumook, wauk mecheekq, (c) yoon nhugkye poonin numaukiyaik indook ka wainjeich maumshaulyaik newauk aqueh meitseteta anahtinumin (d) nin pieyint aqueh kaukanaumweta otillinumowhwaun neal, yoon otillaun wameh yoon menaikq; nul yoon (e) nee mokum, wiskeh ktumaukailmooksoowaukun sookauhaukiyaik, waukitch keta leh wainjeich ahshahnahseik neal muttowhsoowaukunul; Indooka yoon aintrehin meniyaik maumshahlehmaik nee. Amen.

a Yoon hah nun Papimitoonhais aleich nahtinink oolahkunis nin winjeh onachkink.
b Wauk nulneh nin aupwaun aleh pekining.
c Wauk nulneh aleh ahlinning winjeh wnachkink wameh nin auwaum.
d Nulneh naikmah aleich nautinning nin pieyint winj wnachkink.
e Wauk nulneh aleh nah ahlinning winj wnachkink wameh neh ataik nin weasukehmahpoo.

¶ Nullitch hah nun Papimitoorihais shiawh nahtin-ning nin Wcheengawaukun nachpeh neal neshingeil naikmah nelewh wauk aleich pooninumahwaut tpiskahwewh neal linnahpawul. Nullitch neh aindah melaut nin aujnvaun unitch wsein.

NUL yoon whugkye Nalaulquaink Jesus Christ nin meilquonob kekakaukoonj tahleh khugkaing wauk yoon kechechaukoong wainjeich hulmewh pimowhseyun. Nautnehka yoon wauk mecheil wainjeich mishautumin nin ktilleh munnehlataukin nun Christ wainjeich mwhot tahleh koolaumwawetahawaukuning wauk tahleh wahwlalindumoowaukuning.

¶ Wauk nun Papimitoonhais aleich melaut nin pieyint unitch wsein.

NUL yoon mokum Nalaulquaink Jesus Christ sookauhumaukoonob kekakaukoonj tahleh khugkaing wauk tahleh kchechaukoong wainjeich hulmewh pimowhseyun. Menail ka yoon wainjeich mishahtumun nun Christ mokum sookauhaukoonob wahwlalindauka.

¶ Nullitch hah nun Papimitoonhais wseinitch Nalaulwait Pahtumwaukun, neik linnahpawug aleich nahnahplootahwahteit.

NUCHWHENAH aipyun ahwosaukumawh whaerlindahsowitch kitisheenzwaukun; kekiyoowaukun payawekitch, lakitch aleh ta-hiyun yoon tahleh aukeeng ailkehquelaig tahleh ahwosaukumawh. Melenain qui keishqueik wa taupwain meyaink, wauk mewalindumowhwenain njunowhsoowaukuninahnul, ailkeh neloon mewalindumawhwaink neik chachunehlawh waimquaimgweik. Wauk chelahbawhnain leh ahquachetoowaukunink, shukquint ketinehnain winjeh matehkink. Ahloot kinnehlahtumin kekiyoowaukun wauk pahtahweilsoowaukun, wauk quelowhwailmooksoowaukun leh hulmewh wauk aupcheh. Amen.

O NALAULWAYUN wauk ahwosaukumawh Watuchmikiyun, neloon nach watahlookaukahnumeyun naukawhsenain nach neh nin kitmaukalindwaukun aleich nahtinumahweyaing yool ka gaukanaumwaukuninahnul pooninumaukiyunneil; keh kechewach koonjootmauka nin tahleh wtillailehmooksoowaukuning wauk wnoopwaukuning Quesis Jesus Christ wauk noondailmwenain nin mokum, kalah kaitch neloonach wameh neik wailsittongeik tpittowhweitch gachahmenain neal leh shahnalindahmowhtoowaukunul neal nmuttowhsoowaukuninahnul, waukitch dilleh krunnehnain wameh neal ktumaukalindwaukuning wainjehiyekeil nin tahleh wnoopwaukuning. Unitch tahleh kpooninumaukain, O Nalaulwayun, yook ka njehchaukquonahnuk, wauk yool nhugkienahnul tahrenootch kshehreh pimowhsowewh wcheimlaing; ketalindahmowewh knaukaulkaim neloonach aintreh nahtinnumaing yoon peleik Quepoongawaukun dilleich wahchoowekaukoonain nin yoon kitmaukalindwaukun waukoong wainjeh payaweik. Mauha kalah dillehqualehmooksewenah, aleh whraleik neal muttowhsoowaukuninahnul ninaum ktilleh wcheengamahtaukain quaik, weengeek nahtinumahwenain yool dallookawaukuninahnul, mautah aum ktilleh poondhahmahwenain yoon ailkehqualehmookseyaing, tahrenootcheh yool mewalindahmahwenain yool nmahtahlookawaukuninahnul aleh naukahlaing nun Jesus Christ Nalaulquaing ; wauk nah naikmah Peilseid Wchechauk, kee wameh kmeilkain kekiyoowailmooksoowaukun, wauk nin quelahwailmooksoowaukun, O kacheh Watuchmikiyun aupcheh tahleh hulmewh. Amen.

WLAHTANUMOWEWH nun Pahtumowaus nin tahleh waukoong; wauk nin aukeeng oolahpainzwewh, wtilleich ktumaukailmooksenawh neik linwug. Kaukanaumkaim ka, koolalindahmaukaim ka, knesheed quetaukaim ka, quelahwelehkaim ka, kmeilkanul ka neal guakanaumwaukuninahnul nin aleh kecheh welahwailmookseyun, O Nalaulwajun Katanehtooyun, waukoong, aindah kekieyun Katanehtooyun kacheh Watuchmikiyun.

O Nalaulwayun, keen hrp shuk Waqueesmookiyun Jesus Christ; O Nalaulwayun Katanehtooyun, Wamamaikshoomeit nun Katanehtooweit Watuchwhecheil nun Waqueesmint ashahnalind ahmahwaut neal muttowhsoowaukunwahwul aukeeng apehcheik, nahtinumahwenain ka yool pahpahtumwawaukuninahnul. Keh lamahtahpeyun nin tahleh wtilnahahwuning nun Pahtumowaus Watuchmint, ktumaukailmenain ka.

Kelach nhroohah kpeilseim; kelach nhroohah Nalaulwiyun, kelach shuk nhroohah O Christ, wechawhquon nun Peilseid Wchechauk, ahloowewh ktilleh qualehmookseh nin tahleh welahwailmooksoowaukuning nun Pahtumowaus Watuchwheing. Amen.

¶ Unitch wtilleh pooninaum neal wailsittongeik nun Papimitoonhais.

WEENGEH kaitch nin oolehlehwawaukun nun Pahtumowaus mauhah weirkah tetapeh wawehquotook, ksaukehtahmahqnawautch neal kdawahwul, wauk neal kpinahwalindahmoowaukunowah aleich neh ahtaik nin tahleh wloopwawaukuning, wauk nin tahleh wtahwaulwawaukuning nun Pahtumowaus, wauk neal Quesul Jesus Christ Nalaulquaing, wauk kinneh quitmaukalindwaukun nun kacheh Pahtumowauseit, nun Watuchmint, nun Waqueesmint, wauk nah Peilseid Wchechauk ktahpehtaukoowautch wauk wechawhkoowautch aupcheh tahlewh. Amen.

Project Canterbury